Հանդիպում Շամիլյան վարժարանի աշակերտների հետ

   Երևանի N 198 ավագ դպրոցը ապրիլի 7-ին հյուրընկալեց Շամիլյան վարժարանի աշակերտական, ուսուցչական և ծնողական խմբին: Երկու դպրոցների՝ ավանդույթ դարձած ամենամյա հանդիպումը այս անգամ շատ ավելի պարտավորեցնող էր ու նշանակալից. նախ՝ ժամանակահատվածը համընկել էր Ցեղասպանության 100-ամյա տարելիցին նվիրված միջոցառումներին, իսկ հետո՝ ապրիլի յոթին նշվում է Մայրության և գեղեցկության տոնը: Հանդիպման առթիվ կազմակերպված միջոցառման առանցքում էլ հետևաբար դրված էր այս երկու իրադարձությունների՝ անհուն ցավի ու վրեժխնդրության ներկայացման  և մայրական սիրո գովերգության ներդաշնակ համադրությունը, և արդյունքում ընտրվել էր լավագույն լուծումը: Միջոցառման մասնակիցները, կազմակերպիչները ոչ  մի ջանք ու եռանդ չէին խնայել՝ միջոցառումը տպավորիչ ու ամնոռանալի դարձնելու համար: Հյուրընկալ տանտիրոջ պատասխանատվությամբ  նրանք արել էին ամեն ինչ, որպեսզի խորհրդանշական դարձնեն հանդիպումը և մեր հայրենակիցներին պարգևեն գեղեցիկ և հիշարժան օր: Երեխաների խրոխտ երգերն ու հեզանազ  պարերը, ոգեշունչ ասմունքը աշխարհի երկու ծայրերում ապրող հայերի համար նույն նշանակությունն ունեցան. Ցեղասպանություն տեսած հայի հոգին անպարտ է, հավերժ կենդանի, քանզի հային է վիճակված ունենալ աշխարհի ամենաբարի, ամենախելացի ու ամենահայրենասեր մայրը: Մեծ ոճիր ապրած հայը անհաղթ է, քանզի նրան է տրված իրականությանը բաց ճակատով նայելու իրավունքը: Հայը կարողանում է հաջողություններով ոգեկոչվել, ձախողումներից՝  սովորել այլևս չսխալվել: Անցյալի փորձություններն են հային դարձրել այսքան աննկուն ու համառ, մայրական խրատներներով  ու խորհուրդներով է հայը ստացել իր հոգևոր սնունդը, իսկ հայոց մայրերի օրհնանքներն ու աղոթքները՝ փրկել հազար ու մի փորձանքից:

Միջոցառման հաջողությունը, ինչ խոսք, ապահովված էր ոչ միայն իր ուսուցողական, այլև  այն զորավոր և կարևորագույն նշանակությամբ, որը կոչվում է աշխարհասփյուռ հայերի միասնականության գիտակցություն, ասել է թե՝ ուժ, զորություն, փառք... Հպարտության զգացմանը միախառնվել էր իրար թև ու թիկունք լինելու, միմյանց օգնելու ու սատարելու  անհուն ցանկությունը:  Հայը ուժեղ է իր միությամբ. նշանաբանի վերածված այս խոսքերը արդեն հնչեցին միջոցառման ավարտից հետո Երևանի 198 ավագ դպրոցի տնօրեն Ա. Թորոսյանի ելույթում:  << Ծովից ծով դարձած Հայոց աշխարհում վաղվա բաղձալի հաղթանակը աշխարհի բոլոր հայերով  տոնելու և Արագածի փեշերին միասնական շուրջպար պարելու ցանկությունը այլևս երազանք չի թվում, այն մի օր, այն էլ շատ շուտով իրականություն է դառնալու. դրան արժանի է մեր ազգը>>.-այսպես  եզրափակեց իր խոսքը տնօրեն Ա. Թորոսյանը: