Ապագայի տեխնոլոգիաներն այսօր․ 10-րդ դասարանցիների նորարարական նախագծերը «Արհեստական բանականություն» առարկայից

 

Երևանի թիվ 198 ավագ դպրոցում կրկին տեխնոլոգիական եռուզեռ էր․ 10-րդ դասարանի աշակերտները «Արհեստական բանականություն» (ԱԲ) առարկայի շրջանակում ներկայացրին իրենց հերթական հաջողված նախագծային աշխատանքները:

Միջոցառման նպատակն էր գործնականում ամրապնդել ԱԲ համակարգերի ճարտարապետության հիմնարար սկզբունքները՝ մոդուլայնությունը, մասշտաբայնությունը, հուսալիությունը, անվտանգությունն ու գաղտնիությունը:

Աշխատանքներն իրականացվել էին թիմային ձևաչափով․ ձևավորված երկու աշխատանքային խմբերն ընտրել էին արդիական և խիստ պահանջված հետևյալ ուղղությունները․

·         1. «Խելացի տան ավտոմատացման համակարգ» թիմ․ Աշակերտները մշակել և ներկայացրել են տան կառավարման ու ավտոմատացման ժամանակակից լուծումներ՝ մեծ ուշադրություն դարձնելով համակարգերի անվտանգությանը, հուսալիությանը և էներգաարդյունավետությանը:

·         2. «Առողջապահական տվյալների վերլուծության համակարգ» թիմ․ Երկրորդ թիմն ուսումնասիրել և կառուցել է բժշկական տվյալների մշակման ու վերլուծության ԱԲ մոդելներ՝ կենտրոնանալով ախտորոշման ճշգրտության բարձրացման և պացիենտների տվյալների խիստ գաղտնիության ապահովման վրա:

Ստեղծագործական և վերլուծական երկար աշխատանքի արդյունքում թիմերը, որպես վերջնական պրոդուկտ, ներկայացրին բովանդակալից սահիկաշարեր և ակնառու պաստառներ: Նրանք մանրամասն հիմնավորեցին իրենց ընտրած ճարտարապետական մոտեցումները (խմբաքանակային կամ հոսքային) և ցույց տվեցին, թե ինչպես կարելի է ԱԲ-ն ծառայեցնել առօրյա խնդիրների լուծմանն ու մարդու կյանքի որակի բարելավմանը:

Հյուրերը մեծ հետաքրքրությամբ ու հիացմունքով հետևեցին աշակերտների ելույթներին։ ՖԱՍԹ հիմնադրամի հետ համագործակցող ԱԲ մասնագետ Ալլա Բարսեղյանն ուղղեց մասնագիտական հարցեր, և ծավալվեց ակտիվ քննարկում։ Մասնագետի հնչեցրած արժեքավոր դիտարկումներն ու դրական արձագանքը լրացուցիչ ոգևորություն փոխանցեցին աշակերտներին:

Շնորհավորում ենք մեր 10-րդ դասարանցիներին գերազանց աշխատանքի համար և մաղթում նորանոր տեխնոլոգիական բացահայտումներ:

Ուսուցիչ՝ Լորետա Դումիկյան։